menntunarsjodur

Árleg fjáröflun í tilefni mæðradagsins

Mon, 05 May 2025 09:58:05 GMT

Í þrettánda sinn hleypir Menntunarsjóður Mæðrastyrksnefndar Reykjavíkur árlegri fjáröflun sinni af stokkunum í tilefni mæðradagsins.

Eins og síðustu ár fer fram sala á Mæðrablómi Menntunarsjóðsins, sem eins og fyrri ár er Leyniskilaboðakerti. Á ári hverju hafa sérstakir velunnarar lagt söfnuninni lið og má þar m.a. nefna Vigdísi Finnbogadóttur, fyrrum forseta, Elizu Reid forsetafrú og Nínu Dögg Filippusdóttur leikkonu og hafa þær valið kertunum skilaboð. Í ár fagnar sjóðurinn nýjum velunnara, Höllu Tómasdóttir forseta Íslands. Af þessu tilefni bauð forseti Íslands Halla Tómasdóttir styrkþegum og velunnurum til samkomu þann 3. maí kl 15:30, að Bessastöðum.

Leyniskilaboðakertin eru hönnuð af Þórunni Árnadóttur. Kertin eru í glerskálum og þegar kveikt er á þeim og vaxið bráðnar koma smátt og smátt í ljós skilaboð á botni skálarinnar og hafa tilnefndir velunnarar sjóðsins valið skilaboðin. Halla Tómasdóttir valdi textann : Vertu riddari kærleikans.

Kertin verða m.a. til sölu í verslunum Epal, Eymundsson og Blómaval nú í maí. Einnig verður stjórn Menntunarsjóðsins með sölubás í Kringlunni 10 og 11 maí.

Sérstakir velunnarar söfnunarátaksins hafa verið tilnefndir undanfarin ár og hafa stutt vel við fjáröflun sjóðsins; Birna Einarsdóttir Nína Dögg Filippusdóttir, Bríet, Vigdís Finnbogadóttir, Eliza Reid, Lilja Dögg Alfreðsdóttir, Kristín Ingólfsdóttir, Sigríður Thorlacius, Guðrún Hafsteinsdóttir Katrín Tanja Davíðsdótti, Ragnhildur Steinunn, Unnur Ösp og Elísabet.

Auglýst er eftir umsóknum um styrki úr Menntunarsjóði Mæðrastyrksnefndar

Wed, 29 May 2024 10:54:35 GMT

Útskrifuð úr sálfræði og vill nú gefa til baka

Tue, 07 May 2024 12:35:29 GMT

„Ég hélt ekki að ég gæti sótt um þennan styrk. Ég var í miðju háskólanámi í sálfræði og ég hélt að þetta væri frekar fyrir konur sem væru að klára framhaldskóla eða jafnvel konur af erlendum uppruna til að taka íslensku til að komast inn á vinnumarkaðinn.“ Hún bendir á að það að sækja um styrk hjá Menntunarsjóði hafi verið örþrifaráð sem reyndist síðan sá stuðningur sem varð til þess að hún gat klárað námið.

Viðmælandi okkar var komin langt í sálfræðinámi við Háskólann í Reykjavík þegar hún veikist. Veikindin ullu því að hún þurfti að vera frá námi eina önn og byrja síðan rólega aftur með því að taka færri áfanga. Þetta gerði það að verkum að hún gat ekki lengur sótt um námslán sem var lykillinn að því að geta borgað skólagjöldin. „Það er gerð krafa um að þú ljúkir ákveðið mörgum áföngum önnina áður til að geta fengið áfram lán. Staðreyndin er bara að þetta er dýrt nám og erfitt að vera einstæð móðir og ætla sér að komast í gegnum háskólanám í HR.“ Að fá styrk frá Menntasjóði mæðrastyrksnefndar til að greiða hlut í skólagjöldunum og kostnað við bókakaup var það sem bjargaði málunum. „Þetta var stoðin sem ég þurfti til að geta haldið áfram og klárað þessa síðustu önn,“ segir viðmælandi sem útskrifaðist með BS próf í sálfræði frá Háskólanum í Reykjavík vorið 2023.

Spurð að því hvernig það hafi komið til að hún sótti um styrkinn til Menntasjóðsins, segir hún frá því að þetta ár hafi hún tekið ákvörðun um að koma í jólaúthlutun hjá Mæðrastyrksnefnd. Þar hafi hún farið að ræða um sínar aðstæður við starfsfólk sem vann við úthlutunina. „Það var þá sem ég var hvött af starfsfólkinu sem tók á móti mér til að sækja um námsstyrkinn. En, eins og ég segi, það kom mér á óvart að þetta væri styrkur sem veittur væri í háskólanám og að þetta væri eitthvað sem ég gæti sótt um í þessum aðstæðum sem ég var í.“ Hún bendir jafnframt á mikilvægi þess fyrir alla sem eru í svipuðum sporum að leita allra leiða sem eru í boði, að gefast ekki upp og reyna að forðast að upplifa skömm vegna þess að maður þurfi að leita eftir stuðningi.

Aðstæður viðmælenda okkar hafa verið krefjandi allt frá því hún hóf menntaskólagöngu. „Ég byrjaði í raun fyrir alvöru í menntaskóla þegar dóttir mín var í kringum eins árs og gerði þetta síðan bara hægt og rólega.“ Á þessum árum voru þær mæðgur ýmist á almennum leigumarkaði eða í húsnæði í gegnum Félagsmálastofnun. „Síðan, um leið og ég klára stúdentinn 2017, þá sæki ég um leiguíbúð í gegnum BN (Byggingarfélag námsmanna) og fer beint í nám í háskólanum.“ Hún bendir á að það að hún hafi getað verið í námi allan þennan tíma, fyrst í framhaldskóla og svo háskóla, hafi í raun haldið þeim mæðgum á floti, eins og hún kemst að orði. „Ég er búin að búa í íbúðinni hjá BN alveg síðan ég byrjaði í háskólanum en nú er komið að því að ég er að flytja.“

Það má með sanni segja að lífið hafi tekið miklum breytingum síðan. Í dag er hún komin í sambúð, nýtt barn hefur bæst í hópinn og fjölskyldan er búin að kaupa sér íbúð sem þau eru að flytja í. „Þvílík gjörbreyting þetta síðasta ár. Þess vegna langar mig líka svo að gefa til baka. Ég var að njóta aðstoðar og nú er komið að því að ég get stutt aðra.“

Leiðir nýsköpunarrannsókn í matvælafræði

Thu, 14 Mar 2024 15:46:36 GMT

Leiðir nýsköpunarrannsókn í matvælafræði

„Ég hafði lokið þremur árum í læknisfræði við Háskóla Íslands þegar ég varð að hætta námi vegna kvíða og þunglyndis,“ segir viðmælandi minn, rúmlega fertug tveggja barna móðir. Í dag, 11 árum seinna, er hún ein af 73 konum sem Menntunarsjóður Mæðrastyrksnefndar Reykjavíkur styrkir til náms þetta skólaárið. Hún leggur nú lokahönd á mastersritgerð í matvælafræði þar sem hún rannsakar lífvirk efni í því skyni að þróa frekari varðveisluaðferðir andoxunarefna. Jafnframt hefur hún sótt um styrk úr Nýsköpunarsjóði námsmanna til að halda rannsóknum sínum áfram og leggja drög að því hvernig hagnýta megi niðurstöður þeirra.

Lífið er ófyrirsjáanlegt og tekur oft óvæntar sveigjur. Eftir að hafa orðið að hverfa frá námi í læknisfræði, tóku við ár þar sem áherslan var fyrst og fremst lögð á að ná betri tökum á heilsu og líðan. Fyrir um fimm árum síðan var hins vegar aftur komið að því að halda áfram námi. Möguleikar til atvinnu þennan tíma höfðu verið takmarkaðir og hún hafði reitt sig á endurhæfingar- og örorkubætur. Hins vegar duga slíkar bætur stutt þegar óvænt útgjöld koma upp á líkt og oft gerist í barnafjölskyldum. „Það var fyrir ári, eftir röð atvika, sem ég leitaði til Mæðrastyrksnefndar. Ég átti 18 þúsund inni á bankareikningi í upphafi mánaðar og það voru að koma páskar.“ Þetta var í fyrsta sinn sem hún hafði leitað eftir stuðningi og lýsir því að það hafi verið ákveðinn þröskuldur að stíga þetta skref, en að sér hafi verið tekið af hlýju í þessum erfiðu aðstæðum og meðal annars bent á að hún gæti sótt um styrk fyrir skólagjöldum og námsgögnum í Menntunarsjóð Mæðrastyrksnefndar.

„Að vita að ég stend ekki ein og á stuðning vísan hefur bein áhrif á líðan mína,“ segir hún og bendir á að stöðugar áhyggjur af því að láta enda ná saman auki aðeins á og viðhaldi sjúkdómseinkennum. „Það skiptir svo miklu máli fyrir heilsu mína að vita að ég hef stuðning. Til dæmis hafði ég miklar áhyggjur af því hvað tölvan mín, þar sem öll mín gögn voru vistuð og þar sem kennslan fór fram, var orðin léleg. Meira að segja hljóðið var hætt að virka. Þá tók Menntunarsjóður við og styrkti mig með tölvu og létti þannig af mér þessum kvíðavaldi.“

Hún lýsir því jafnframt hvernig áhyggjur af því að eiga fyrir skólagjöldum og námstengdum kostnaði hafi bæst ofan á áhyggjur af öðrum útgjöldum heimilisins. „Að eiga fyrir þessu var streituvaldur sem lagðist yfir og eyðilagði sumarið. Þess vegna, þegar ég veit nú að allir þessir hlutir, námsgjöld og bókastyrkur eru tryggir, þá er það svo stór partur af því að draga úr áhyggjum… Mér líður miklu betur af því að ég veit að þetta verður allt í lagi,“ segir hún og bætir svo við, „það verður allt svo miklu skemmtilegra og léttara þegar ég veit að endar ná saman.“

Stefnir á meistaranám í talmeinafræði

Thu, 14 Mar 2024 15:42:34 GMT

Stefnir á meistaranám í talmeinafræði

„Þetta er bakland sem ég veit að ég get leitað til,“ segir viðmælandi minn, einstæð móðir og nemandi við Háskóla

Íslands, en hún er ein af þeim konum sem Menntunarsjóður Mæðrastyrksnefndar styrkti til náms. Sjóðurinn hefur

staðið þétt við bak hennar með árlegum námsstyrkjum. Hún er nú að ljúka námi og mun útskrifast í vor með BA

próf í íslensku. Hún stefnir síðan ótrauð áfram og hyggst hefja meistaranám í talmeinafræði við Háskólann í

haust, en það nám mun veita henni starfsréttindi sem talmeinafræðingur.

Viðmælandi minn gaf sér tíma til að líta upp úr bókunum í stutt spjall deginum fyrir fyrsta próf. „Sjóðurinn hefur

borgað skólagjöldin mín og svo fæ ég líka styrk fyrir námsgögnum á hverri önn.“ Þannig bendir hún á að

sjóðurinn hafi létt henni þann fjárhagslega þrýsting sem hún hefði annars búið við sem einstætt foreldri í námi.

Stuðningur Menntunarsjóðsins hefur „bætt lífskjörin og hefur til dæmis gert okkur kleift að eiga skemmtilegan tíma

saman á sumrin,“ segir hún. Hún bendir á mikilvægi þessa þáttar því staðreyndin sé að „skortur komi ekki síst

niður á barni.“

„Ég frétti af sjóðnum þegar ég fór með vinkonu minni í fataúthlutun til Mæðrastyrksnefndar. Þar hitti ég yndislega

konu sem sagði mér að ég gæti sótt um styrk til að halda náminu áfram.“ Á þessum tíma var hún á fyrsta ári í

íslensku í Háskóla Íslands, einstæð móðir og, eins og hún segir sjálf, „ég átti enn þá svo langt í land. Ég sá bara

fram á að safna skuldum.“

Þegar hún hugsar til þess hverju stuðningur sjóðsins hafi breytt í lífi sínu segir hún einna mikilvægast hvernig

„styrkurinn skilaði sér til stráksins míns.“ Hún bendir til dæmis á að borgað hafi verið fyrir sumarnámskeið fyrir

son hennar þannig að hann gat tekið þátt og hlakkað til skemmtilegra hluta á sumrin þótt hún væri einstæð í

námi.

Hún horfir björtum augum á framtíðina og hlakkar til að takast á við á meistaranám í talmeinafræði sem, eins og

hún bendir á, býður upp á mjög breiðan starfsvettvang. „Þetta er ótrúlega spennandi leið til að hjálpa fólki og það

er hægt að velja að vinna með ólíkum hópum.“ Það sem samt heilli hana einna mest við

framtíðarstarfsvettvanginn sé að vinna með og vera í kringum fólk, ekki síst börn.

Gaman að finna hvað margir eru tilbúnir að leggja okkur lið

Thu, 14 Mar 2024 15:30:56 GMT

Gaman að finna hvað margir eru tilbúnir að leggja okkur lið

„Það er kannski helst þessi þrautsegja og dugnaður kvennanna sem kemur endalaust á óvart,“ segir Guðríður Sigurðardóttir þegar hún lýsir upplifun af starfi sínu sem formaður Menntunarsjóðs Mæðrastyrksnefndar. „Hvernig þær finna þennan extra kraft í aðstæðum sem eru oft mjög erfiðar, taka af skarið og ákveða að fara samt í nám. Mér finnst þetta bara stórkostlegt afrek.“

Menntunarsjóður hefur starfað í tæpan áratug og hefur frá stofnun vaxið mikið að umfangi. Í dag styrkir hann rúmlega 70 konur til náms. „Það vita sífellt fleiri af tilvist sjóðsins sem ef til vill skýrir hvers vegna umsóknir hafa aukist svo mikið. En okkur er að sjálfsögðu kappsmál að geta styrkt sem flestar þær konur sem leita til okkar og þurfa á þessum stuðningi að halda. Það er þess vegna sem við erum í stöðugri fjáröflun. Við viljum geta mætt þeirri þörf sem mætir okkur hverju sinni,“ bendir Guðríður á.

Fjáröflunin byggir að stórum hluta á árlegri sölu „mæðrablómsins“ sem undanfarin ár hefur verið í formi leyniskilaboðakertis, þar sem skilaboð frá velunnurum sjóðsins koma í ljós þegar kveikt er á því.

Starfið fyrir sjóðinn er fjölbreytilegt. Guðríður segir margt hafi komið sér ánægjulega á óvart, ekki síst „hvað allir hafa verið jákvæðir í garð sjóðsins og hvað margir hafa verið tilbúnir að leggja okkur lið.“ Það hafi verið sérstaklega gaman að kynnast þeim mikla fjölda fólks úr ólíkum áttum sem hafi verið fúst til að leggja hönd á plóginn. „Svo er líka auðvitað þessi sterka tilfinning, að maður sé að gera gagn. Þega konur sækja um styrk ár eftir ár og þegar maður sér að þær eru að ljúka námi og jafnvel fá vinnu við það sem þær lærðu, það er alveg rosalega gefandi.“

Guðríður bendir á að starfið fyrir sjóðinn eigi sér líka ýmsar óvæntar hliðar. „Ég hefði til dæmis aldrei haldið að mér þætti gaman að standa í Kringlunni og selja kerti. En það er eitt af því sem hefur komið skemmtilega á óvart. Mér finnst svo gaman að hitta og kynnast nýju fólki. Maður er heldur ekki bara að fá fólk til að styrkja gott málefni heldur líka að selja fallega vöru. Fólk kemur jafnvel sérstaka ferð til að kaupa kertin sem gjöf. Þetta er eitthvað sem fólk langar raunverulega að gefa og eiga“.

Skilaboðin sem leynast í hverju kerti eru valin af velunnurum sjóðsins. „Velunnararnir eru konur sem eru öflugar fyrirmyndir fyrir alla en geta líka hjálpað okkur við að vekja athygli á starfsemi sjóðsins. Þær Vígdís Finnbogadóttir og Eliza Reid hafa lagt okkur lið síðustu ár og svo höfum við fengið eina nýja konu til að vera með á hverju ári. Við munum að sjálfsögðu líka gera það í ár. Þetta er skemmtileg hefð og það skapast alltaf svolítil spenna í kringum að kynna nýjasta velunnarann og þau skilaboð sem hún velur.“

Reykjavíkurmaraþon

Tue, 17 Oct 2023 10:41:13 GMT

Við viljum þakka Kristmundi Axel, Margréti Evu og Freyju Sigríði sem hlupu samtals 62,2 kílómetra á laugardaginn og söfnuðu áheitum fyrir Mæðrastyrksnefnd Reykjavíkur kærlega fyrir stuðninginn! Einnig viljum við þakka þeim sem styrktu hlauparana okkar. Án ykkar allra væri starfsemi Mæðrastyrksnefndar Reykjavíkur ekki gerleg.

Takk!

Áheitasöfnun hlaupsins er ennþá opin og verður til miðnættis 21. ágúst.

https://www.rmi.is/.../8200-kristmundur-axel-kristmundsson

https://www.rmi.is/.../8631-freyja-sigridur-asgeirsdottir

https://www.rmi.is/.../8216-margret-eva-sigurdardottir

Fyrir hönd Mæðrastyrksnefndar Reykjavíkur,

Anna, Nína og Auður.

Ragnhildur Steinunn og Edda fögnuðu mæðrum

Tue, 17 Oct 2023 10:41:13 GMT

Konum og mæðrum var fagnað hinn 10. maí síðastliðinn þegar árleg fjáröflun Menntunarsjóðs Mæðrastyrksnefndar Reykjavíkur fór af stað við skemmtilega athöfn. Á viðburðinn mættu velunnarar og styrkþegar sjóðsins og börðu „Mæðrablóm“ ársins augum.

Á ári hverju velja velunnarar sjóðsins skilaboð á Mæðrablómið, en þetta er í sjötta sinn sem það er í formi leyniskilaboðakerta sem hönnuð eru af Þórunni Árnadóttur vöruhönnuði. Í ár er fjölmiðlakonan Ragnhildur Steinunn Jónsdóttir velunnari sjóðsins og valdi hún setninguna: „Gefðu allt sem þú átt. Draumurinn getur ræst.“

Allur ágóði af sölu Mæðrablómsins rennur óskertur til Menntunarsjóðsins sem styrkir tekjulágar konur til náms. Sjóðurinn var stofnaður árið 2012 og hefur það markmið að auka möguleika kvenna á að finna störf sem geta tryggt þeim og fjölskyldum þeirra öruggari framtíð.